About usOur TeamGalleryWhy SLPEF?Membership
Job BankNewsContact us

විදුලි කණුවක්, සිමෙන්ති කොට්ටයක්, අරමුණක්, උත්සායක්, කැපවීමක්, පාලමක්

විදුලි කණුවක්, සිමෙන්ති කොට්ටයක්, අරමුණක්, උත්සාහයක්, කැපවීමක්, පාලමක්..

ජලය කියන්නෙ අපේ ජීවිතයට බද්ධ වෙලා තියෙන නැතුවම බැරි දෙයක්. අපිට ආහාර නැතුව යම් කාලයක් ඉන්න පුළුවන් උනත් වතුර නැතුව ඉන්න පුළුවන් බොහොම ටික කාලයක් විතරයි. ඒ විතරක් නෙමේ අපේ ආහාර නිෂ්පාදනයටත් ජලය අත්යාවශ්ය සාධකයක්. මෙච්චරම අපිට සමීප ජලය වෙලාවකට පුංචි කරදරකාරයෙක් වෙනව. ගඟක් ඔයක් ඇලක් කියන්නෙ අපිට අමිල සම්පතක් වෙනව වගේම ඒකෙන් ගඟ දෙපැත්තෙ ඉන්න මිනිස්සු භෞතිකව වෙන් කරනව. මේ භෞතික වෙන් වීම බොහෝ සාමාජීය ගැටළු වලට හේතුවෙනව. ඒ වෙන් කිරිම යා වෙන්නෙ පාලමකින්. අද දවසෙ අපේ අරමුණ ටිකක් විශේෂ පාලම් වර්ගයක් ගැන කථා කරන්න.

පසුගිය දවසක මේ සුවිශේෂී පාලම් 2ක් ජනගත කරා වගේම සමාජ මාධ්ය  ඔස්සේ විවිධ මඩ ප්රචාර වලටත් ලක් වුණා. ඉතින් ඒ සියළුම දෙ ගැන කථා කරන්න අපිත් එක්ක සම්බන්ධ උනා "පොදුජන පාලම් දහස" ව්යාපෘතියේ ඉදිරිපෙල නියමුවන් දෙන්නෙක්. ඒ ශ්රී ලංකා පොදුජන ඉංජිනේරු පෙරමුණේ ප්රධාන ලේකම්, ඉංජි. (මේජර්) සමන්ත ඉන්දික මහතා හා එම පෙරමුණේම රත්නපුර දිස්ත්රික් සංවිධානයේ සභාපති ඉංජි. ඉන්දික රාජකරුණා මහතා.

"පොදුජන පාලම් දහස"  ගැන කතා කරන්න කලින් අපි පොඩ්ඩක් ඉංජිනේරු පෙරමුණ ගැන කියලම ආරම්භයක් ගමු.සමන්ත ඉන්දික මයා : ශ්රී ලංකා පොදුජන ඉංජිනේරු පෙරමුණ කියන්නෙ මේ මොහොත වන විට ලංකාවෙ දේශපාලන පක්ශයක් හා අනුබද්ධ විශාලතම හා ප්රභලතම වෘත්තීය සංවිධානය වගේම එකම ඉංජිනේරු සංවිධානය. මීට වසර 3 කට විතර කලින් අපේ ආරම්භය සනිටුහන් වෙන්නෙ රටේ තිබ්බ විශාල හිදැසක් දැකල. මේ හිදැස සාමාජීය, ආර්ථික, ආයතනික වගේම දේශපාලන ක්ෂේත්රයෙත් දක්නට ලැබුණු දෙයක්. ඒ තමා පොදු සමාජයේ ප්රගමනයට වෘත්තිකයා දෙන දායකත්වයේ  අඩුව. බොහෝ දෙනා තම දියුණුව ඉලක්ක කරගෙන විදේශ ගත වෙනවා. අනික් අය තමන්ගේ රැකියාව විතරක් කරගෙන ඉන්නව. රටේ පොදු මහජනතාව "වෘත්තීමය දායකත්වයක්" නැති කමින් පීඩා විඳිනවා. අපි කරේ මේ හිඩැස තුළ නිහඬව හිටපු ඉංජිනේරුවන් ටික එක අරමුණකට එකතු කරල ඔවුන්ගේ හඬ අවධි කරපු එක.

ඔබ හොඳ ප්රවේශයක් ගත්ත. අපි ප්රධාන මාතෘකාවට එන්න කලින් තව ටිකක් මේ ඔස්සේම යමු.

සමන්ත ඉන්දික මයා : අපේ පෙරමුණ තුල ඉන්න සියළු දෙනාම ලංකාවෙ හරි ලෝකේ වෙනත් රටක හරි පිලිගත් විශ්වවිද්යාල වලින් බිහිවුන ඉංජිනේරුවන්. මේ හැමෝටම තමුන්ගේ වෘත්තීමය හැකියාවට අමතරව ගොඩනඟගත්ත, දියුණුකරගත්ත අමතර දක්ෂතා තියනවා. සමහර අයට ක්රියාකාරී දේශපාලනය ගැන උනන්දුව වගේම හැකියාව තියනව. තවත් අය ඉන්නව කලමණාකරන, නායකත්ව හැකියාවන් දියුණු කරගෙන ආයතන වලට නායකත්වය දීල දියුණු කරන්න පුළුවන්. ඒ වගේම තව විශාල පිරිසක් අපි වටේ එකතු වෙලා ඉන්නව තමුන්ගේ වෘත්තිය තුලින් ඉදිරියටම ගිහිල්ල රටේ ඉදිරි සංවර්ධනය ගැන ප්රතිපත්ති සම්පාදනයට දායක වෙන්න පුළුවන් හැකියාව තියන, විශේෂඥ දැනුම තියන. මේ විදිහට විවිධ හැකියාවන් තියන 5,000 කට අධික ඉංජිනේරුවන් පිරිසකගෙ එකතුවක් තමා පොදුජන ඉංජිනේරු පෙරමුණ. දැන් අපි කරන්නෙ මේ එකතු කර ගත්ත සුවිශේෂී පිරිස අවශ්යතාවයන් තියන තැන් වලට ක්ෂේත්ර වලට යොමු කරල ඔවුන්ගෙන් මෙතෙක් වෘත්තීමය වශයෙන් ලබාගත් සේවයට අමතරව සේවයක් රටට ලබා දීම. මේ ඉන්න කිසි කෙනෙක් තමුන්ගෙ පෞද්ගලික වාසි බලාගෙන අපිත් එක්ක එකතු වෙච්ච අය නෙමේ. මෙතෙක් කලක් තමුන් සේවය කරපු ආයතනයට විතරක් ලබාදුන්න සේවය පොදුවේ මහජනතාවට ලැබෙන විදිහට පුළුල්ව අරමුණක් සහිතව යන ගමනක්.

ඒකට පොදුජන පෙරමුණට අනුබද්ධ වීම අවශ්යම ද? ස්වාධීන සංවිධානයකින් ඕක කරන්න බැරිද?

සමන්ත ඉන්දික මයා : ඕක ප්රායෝගිකත්වයෙන් තොර, සෛද්ධාන්තික හීන ලෝක වල ජීවත්වෙන අය හැමවෙලේම අහන දෙයක්. අපි කරන හැම දේකම අවසන් ප්රතිඵලයක් තියෙන්න ඕන. එහෙම නැති දේකට මහන්සි වෙලා තේරුමක් නෑ. අපි බැලුවේ අපේ දැක්මට හරියන වැඩපිලිවෙලක් තියන පක්ෂය මොකද්ද ?, ඒකත් එක්ක සම්බන්ධ වෙලා අපේ අරමුණට යන්න ඉඩප්රස්ථා හදාගන්න පුළුවන්ද? කියන දේ. අපිට ගඟෙන් එහාට යන්න ඔරුවක නඟින්නම වෙනවා. මෙහා ඉවුරෙ ඉඳන් පාලමක් හැදෙනකම් හරි ගඟ හිඳෙනකම් හරි බලාගෙන හිටියොත් හැමදාම මෙහා ඉවුරෙම තමා. අපි මේක ආරම්භ කරද්දි පොදුජන පෙරමුණ කියන්නෙත් නැවුම් පක්ෂයක්. හැබැයි අපි දැක්ක බැසිල් රාජපක්ෂ කියන අති දක්ෂ සංවිධායකවරයාගේ සංවිධාන ශක්තිය කොහොමද මේ පක්ෂය ඇතුළෙ දුවන්නෙ කියන එක. මහින්ද රාජපක්ෂ කියන දැවැන්ත දේශපාලන පෞර්ෂය  කොහොමද මේ පක්ෂයට නායකත්වය දෙන්නෙ කියන එක. ඊළඟට අපිට තිබ්බ ගැටළුව තමා අපේ අදහස් වලට පක්ෂය ඇතුලෙ ඉඩක් ලැබෙයිද කියන එක.

ඒ සඳහා ඔබට ඉඩක් ලැබුනද ?

සමන්ත ඉන්දික මයා : ඔව්. අපි බලාපොරොත්තු උනාටත් වඩා හොඳින් ඒක සිද්ද උණා. ඔබටත් මතක ඇති ජනාධිපතිවරණ ප්රචාරණ කටයුතු වල පෙරළියක් කරපු "V can " ජංගම දුරකථන යෙදවුම. කිසිම පැකිලීමකින් තොරව අපේ අළුත් අදහස් වලට දුන්න ඉඩ කඩ තමා ඒ. ඔබ බලන්න මේ මොහොතේ දේශපාලන පක්ෂ, අපේක්ෂ්කයො කී දෙනෙක් ඒ හා සමාන ජංගම දුරකථන යෙදවුම් භාවිතා කරල ප්රචාරණ කටයුතු කරනවද කියල. ඒ විතරක් නෙමේ, අතිගරු ජනාධිපති ගෝඨාභය රාජපක්ෂ මහතාගේ ජයග්රහණයෙන් පස්සෙ, සුදුස්සාට සුදුසු තැන ලබා දිය යුතුයි කියන එතුමාගේ සංකල්පය එක්ක කැබිනට් හා රාජ්ය අමාත්යාංශ ලේකම්ධූර, රාජ්ය සංස්ථා හා ව්යවස්ථාපිත මණ්ඩලවල සභාපති හා අධ්යක්ෂධූර, රාජ්ය සමාගම් වල සභාපති හා අධ්යක්ෂධූර වැනි රටේ සංවර්ධන ක්රියාදාමයේ ඉතා වැදගත් තැන් බොහොමයකට සුදුසු ඉංජිනේරුවන් යොමු කරන්න අපිට හැකියාව ලැබුණා. අතීතයේදී මේවා හම්බුනේ සුදුස්සන්ටද දේශපාලන හෙන්චයියන්ටද කියන එක ඔබම මතක් කරල බලන්න. මේ තනතුරු ඔවුන්ගේ හැකියාවන් හා දක්ෂතාවයන් නිසා ලැබුණු දේවල් මිසක් අපේ සාමජිකත්වය හින්ද ලැබුණු දේවල් නෙමේ. ඔවුන්ගේ හැකියාවන් සහ කැපකිරීම් වල ප්රතිඵල දැනටමත් පේන්න තියනව. නුදුරු අනාගතයේදී ඒවා වඩා හොඳින් දකින්න ලැබේවි.

අපි දැන් ප්රධාන මාතෘකාවට එමු. මොකද්ද මේ "පොදුජන පාලම්" කියන්නෙ?

ඉන්දික රාජකරුණා මයා : වර්ථමාන ජනාධිපතිතුමා පසුගිය වසරේ ජනාධිපතිවරණයට ඉදිරිපත්වෙද්දි අපි ඉංජිනේරු පෙරමුණ විදිහට එතුමගේ ප්රතිපත්ති ප්රකාශයට අපේ අදහස් ඉදිරිපත් කරා. අපේ යෝජනාවලිය සකස් කරන්න කලින් අපි අපේ සා  මාජිකත්වය එක්ක රටේ තියන පුංචිම ගැටළුව පවා හඳුනාගන්න මහන්සි උණා. ඒකෙ ප්රථිඵලයක් විදිහට අපි දැක්ක එක් ප්රධාන ගැටළුවක් තමා මේ ගඟක්, ඔයක් නිසා දෙපැත්තේ ඉන්න ගම්වැසියො භෞතිකව වෙන්ව ජීවත්වීම. මේ විදිහෙ ප්රවාහන ගැටළු තියන තැන් ටික අරගෙන සමස්ථය බැලුවම මේක ලොකු ගැටළුවක්. අපි බැලුවෙ මේකට රාජ්ය මැදිහත්වීමක් නැතිව විසඳුමක් දෙන්න පුළුවන්ද කියල. සමස්ථය විශාල වුණාට තනි තනිව මේ ගැටළු තියන තැන් ටික ගත්තම  යම් මට්ටමක සරල විසඳුම් මඟින් විසඳන්න පුළුවන් බව අපි දැක්ක. සමස්ථයට දෙන විසඳුම තමා "පොදුජන පාලම් දහස". හැබැයි ඒක තනි තනිව ඉදිවෙන පාලම් දහසක්. ආරම්භය තමා අපි කෑගල්ල දිස්ත්රික්කයේ යටියන්තොට ප්රාදේශීය ලේකම් කොට්ඨාශයේ "නවට" ග්රාමයේදී සනිටුහන් කරේ. දෙවන සහ තුන්වන පාලම් දෙකත් යටියන්තොට ප්රාදේශීය ලේකම් කොට්ඨාශයේම “ගනේපල්ල” ප්රදේශයේදී වැඩ ආරම්භ කරා. ඒ පාලම් තුනෙන් පළවෙනි පාලම් දෙක අපි පසුගියදා සබරගමුව පලාත් ගරු ආණ්ඩුකාර ටිකිරි කොබ්බෑකඩුව මැතිතුමා අතින් ජනගත කරා. එතුමා තමා මේ අවශ්යාතාවයන් තිබෙන තැන් ගැන අපව දැනුවත් කරල මේ සද්කාර්යයට ඉඩ කඩ ලබා දුන්නේ.

ව්යාපෘතිය ගැන අදහසක් දුන්න වගේම පාලමක් ගැනත් පොඩ්ඩක් කියමු නේද?

ඉන්දික රාජකරුණා මයා : අපි නවට ඉදිකල පාලම අඩි 60ක් දිග පාලමක්. අනික් පාලම් දෙකම අඩි 30 බැගින්  දිග ඒවා. මේ ප්රදේශවල දිය පහර නිසා ප්රධානම බාදාව ඇතිවෙලා තිබුනේ සාමාන්ය මිනිස් සංචරණයටයි. ඒ හින්ද අපි ආරම්භයේදීම තීරණය කරා මේ පාලම් මිනිස්සුන්ගේ මූලිකම ප්රවාහන අවශ්යතා, වෙනත් විදිහකට කීවොත්, පයින් යන්න, මෝටර් බයිසිකලයකින් යන්න හා උපරිම වශයෙන් ත්රී රෝද රථයකින් යන්න පුළුවන් වෙන විදිහට මේක නිර්මාණය කරන්න. හැමෝටම තේරෙන විදිහට කිව්වොත් ඉස්කෝලෙ ළමයින්ට සපත්තු දෙක නොතෙමී පයින් ඉස්කෝලෙට යන්න, ගමේ මරණයක් උනාම ඔලුවටත් උඩින් පෙට්ටිය උස්සගෙන ඔයේ බැහැල යන්නෙ නැතිව මරණෙ කටයුතු ඉවර කරන්න, හදිස්සි ලෙඩෙක්ව කිලෝමීටර් 4,5ක් ඈතින් තියන ඉස්පිරිතාලෙට ගෙනියන්න කිලෝමීටර් 20,25 ත්රී වීල් එකේ රවුම් ගහන්න වෙන එක නැති කරන්න වගේ. ඒ අනුව අඩි 6ක පළලකින් යුතුව තමා මේව ඉදිවුණේ. දළ වශයෙන් මේ වගේ අඩි 60ක පාලමකට රු. ලක්ෂ 6ක් පමණ වියදමක් දරන්න වෙනව. හැබැයි මේ වියදම පාලම ඉදිකරන ස්ථානය අනුව ටිකක් වෙනස් වෙන්න පුළුවන්. මේ කරුණත් මං විශේෂයෙන්ම සඳහන් කරන්න ඕන. මේ ව්යාපෘති කිසිම එකකට රජයේ මුදල් සතයක්වත් අපි වියදම් කරල නෑ. සියළුම වියදම් ඉංජිනේරු පෙරමුණේ සාමාජිකත්වයෙන් හා හිතවතුන්ගෙන් ලබාගෙනයි ඉදිකරේ.

මේ සඳහා විදුලි කණු යොදා ගැනීම ටිකක් කථා බහට ලක් වෙලා නේද?

ඉන්දික රාජකරුණා මයා : ඔව්. මඩ ගැසීම ජීවිකාව කරගත්ත පුද්ගලයො කීපදෙනෙක් ඒ ගැන මඩ ප්රචාර යවන්න පටන් අරන් තියනව. ඔය මඩ ගහන කට්ටිය දාල තියන ෆොටෝ එකේ ඉන්න මිනිස්සුන්ගෙ බර ගණන් බැලුවත් පාලමේ ශක්තිය පේනව. අපි මේ සඳහා විදුලි කණු යොදා ගත්තෙ ඒ ගැන පුළුල් අධ්යනයක් කරල. අඩි 30ක පාලමකට මීටර් 13ක් දිග කණු 6ක් යනව. මේ එක කණුවක්වත් භාවිතාකරල ඉවත දාපු කණු නෙමේ. නිෂ්පාදනය කිරීමේදී ඇතිවූ සුළු නිෂ්පාදන දෝෂ නිසා භාවිතයට නොගෙන ඉවත් කරපුව. ඒ එක දෝෂයක්වත් කණුවෙ ශක්තිමත්භාවයට බලපෑමක් කරන විදිහෙ ඒව නෙමේ.  විදුලි කණුවක් විදිහට යොදාගන්න නොගැලපුනත් මේ වගේ කාර්යයකට හොඳට ගැලපෙන ඒවා. අනික් එක අපිත් එක්ක ලංකාවෙ ප්රසිද්ධ සිවිල් ඉංජිනේරුවන්, ව්යුහාත්මක ඉංජිනේරුවන් මේ කාර්යයේදී  සම්බන්ධ වුණා. ඔවුන්ගේ පූර්ණ අධීක්ෂණය යටතේ තමා මේකෙ මූලික සැකැස්ම ඇඳුනෙ. විදුලි කණුවක් පොළවෙ හිටවලා ඒ මතින් විදුලි කම්බි ඇදීමේදී කණුව මත ඇතිවන බාහිර බලයන් හා ඒ කණුව පාලමක් විදිහට හරස් අතට යොදාගනිද්දි ඇතිවන බාහිර බලයන් බොහෝ දුරට සමානයි. ඒක නිසා මේකෙ ශක්තිමත්භාවයට ගැන විෂය දැනුමක් නොමැති අය මඩ ගැසුවට ක්ෂේතයේ පලපුරුදු ඉංජිනේරුවන් විදිහට අපිට සහතිකයක් දෙන්න පුළුවන් ඒ ගැන.  මේ පාලමකින් සේවය ලබා ගන්නෙ පවුල් 25-30ක් ඉන්න ගම්මාන. ඒ කියන්නෙ සාමාන්යයෙන් මිනිස්සු 150- 200ක් විතර. එයාලගෙ අවශ්යතාවයට ප්රධාන මහාමාර්ගයක තියන පාලමක් වගේ ශක්තිමත් එකක් ඔන්න නෑ. අඩි 6ක පාලමක් හොඳටම ප්රමණවත්. මේ වගේ දුෂ්කර ගමක මනුස්සයෙක්ට පාලම දැකල ඇහැට  එන එක සතුටු කඳුළු බිංදුවකින්, කොළඹට වෙලා කම්පියුටර් ඉස්සරහ ඉඳන් මේවට ගහන මඩ හේදිල යනව.

මේ දැවැන්ත කාර්යය පිටුපස්සෙ ඉන්න අය ගැනත් ටිකක් කිව්වොත්....

සමන්ත ඉන්දික මයා : ශ්රි ලංකා පොදුජන ඉංජිනේරු පෙරමුණේ සභාපති, ඉංජි. විජිත හේරත් මහතා ප්රමුඛ අප පෙරමුණේ ජාතික කමිටුවේ සියළුම නිලධාරීන් මේ අදහස ඇතිවූ මොහොතේ ඉඳන් මේක යතාර්ථයක් බවට පත්කරන්න මහන්සි වෙලා කටයුතු කලා. ඒ වගේම මේකේ මූලික සැලැස්ම සකස් කිරීමේ ඉඳන් තම විශේෂඥ දැනුම ලබාදුන් පේරාදෙණිය විශවවිද්යාලයේ ඉංජිනේරු පීඨයේ මහාචාර්ය රංජිත් දිසානායක මහතා ප්රමුඛ අපේ සිවිල් ඉංජිනේරු සාමාජිකත්වය ඉතා විශාල සේවයක් කරා. මේ ඉදිකිරීම් වල මූල්ය දායකත්වයෙන් වැඩි කොටසකට වගකියමින්, ඉදිකිරීම් කරමින් හා ඉදිකිරීම් කාලය තුල අවශ්ය අධීක්ෂණ කටයුතු කරමින් මේ ක්රියාවලියට ලොකු සවියක් පොදුජන ඉංජිනේරු පෙරමුණේ රත්නපුර දිස්ත්රික් සභාපති ඉංජි. ඉන්දික රාජකරුණා ප්රමුඛ  රත්නපුර දිස්ත්රික් පොදුජන ඉංජිනේරු පෙරමුණු සාමාජිකත්වයෙන් ලැබුණා.

ඉදිරි පියවරයන් ගැනත් සඳහන් කරොත්.....

දැනට අපි මේ වගේ අවශ්යතාවයන් තියෙන් තවත් තැන් කීපයක් හඳුනගෙන තියනව. ඒව ඉදිරියේදි ක්රියාත්මක තලයට ගන්න අවශ්ය මූලික කටයුතු අපි පටන් අරන් තියෙන්නෙ. ඒ වගේම මේ වගෙ දේවල් ගැන බොරු මඩ ප්රචාර යවන අයටත් අපි කියන්නෙ පුළුවන්නම් පාලමක අවශ්යතාවය තියෙන් තැන් අපිට හොයල දෙන්න. පාලමේ ශක්තිමත්භාවයට  අපි වගකියන්නම්. මේක ඉංජිනේරු පෙරමුණේ හැමෝම එකා වගේ මහන්සි වෙලා කරපු තවත් එක ව්යාපෘතියක්. අවසාන වශයෙන් මේ ව්යාපෘතියට වගේම අපේ පෙරමුණටත් දැවැන්ත ශක්තියක් ලබා දෙමින් නායකත්වය ලබාදෙන ඉංජි. විජිත හෙරත් මහතාටත් ඔහු පිටුපස සෙවනැල්ලක් වගේ සිටින අපේ සමස්ථ සාමාජිකත්වයටත් මේ සද්කාර්යයට උපකාර කිරීම පිලිබඳ ස්තුතිය පළකරනවා. ඒ වගේම අපි විවෘත ආරාධනයක් කරන්න කැමතියි මේ වගේ කටයුතු වලට අත හිත දෙන දානපතියන්ට හා ස්වේඡ්චා සංවිධාන වලය ඉදිරි ව්යාපෘති වලදී අපිත් එක්ක අත්වැල් බැඳගන්න කියල.

ශ්රී ලංකා පොදුජන ඉංජිනේරු පෙරමුණේ ප්රධාන ලේකම්, ඉංජි. (මේජර්) සමන්ත ඉන්දික මහතා හා එම පෙරමුණේ රත්නපුර දිස්ත්රික් සංවිධානයේ සභාපති ඉංජි. ඉන්දික රාජකරුණා මහතා සමඟ කල සාකඡ්චාවක් ඇසුරිනි.

-පොදුජන ඉංජිනේරු පෙරමුණු මධ්ය කමිටුව.

Organization
About UsOur TeamContact Us
Members
Why SLPEF?MembershipJob Bank
Social
FacebookYoutube
The Sri Lanka's most powerful engineers organization for professional engineers.
© All rights reserved. 2020 SLPEF